Türkmenistanyň biržasynda 43-nji hepdäniň söwda amallary jemlendi
Türkmenistanyň Döwlet haryt-çig mal biržasynda 2026-njy ýylyň 43-nji hepdesinde geçirilen birža söwdalarynyň netijesinde daşary ýurtly we ýerli işewürler bilen umumy bahasy 9 970 880,00 ABŞ dollaryna we 27 215 000,00 manada deň bolan geleşikler baglaşyldy. Hepdäniň dowamynda amala aşyrylan söwda amallary milli önümlerimize daşarky we içerki bazarlarda uly isleginiň saklanýandygyny görkezdi. Daşarky bazarda geçirilen söwdalaşyklaryň barşynda daşary ýurtly hyzmatdaşlar tarapyndan uly möçberde tekstil, azyk we gurluşyk önümleri satyn alndy. Şunlukda, Türkiýäniň işewürleri 1-nji hilli arassalanan pagta ýagyny, kreton matasyny we portlantsementi, Serbiýanyň wekilleri buýan köküniň arassalanmadyk glisirrizin turşusyny haryt edindiler. Mundan başga-da, Birleşen Arap Emirlikleriniň işewürleri 1-nji hilli bugdaý unyny, Azerbeýjanyň söwda hyzmatdaşlary bu ýerli işewürlerden nah ýüplügini satyn almak barada özara bähbitli ylalaşyklara gol çekdiler. Içerki bazarda bolsa ýerli telekeçiler milli önümçiligi ösdürmek we ilaty azyk önümleri bilen üpjün etmek maksady bilen birža amallaryny aktiw geçirdiler. Hepdäniň dowamynda ýerli işewürler Türkmenistanyň Azyk senagaty döwlet birleşiginden pagta ýagynyň çökündisiniň ýagly turşylyklaryny hem-de "Türkmengallaönümleri" döwlet birleşiginden 1-nji hilli bugdaý unyny satyn almak barada geleşikleri baglaşdylar.